السبت، 5 مارس 2016



هي فين النضارة ؟؟
سألت نفسي سؤال ألا وهو

ليه كل مرة أقلع فيها النظارة أفضل أدور عليها ؟؟؟

وبعد تفكير مش كبييييييير عرفت ليه

عشان وانا بدور على النضارة مش ببقى لابس النضارة وبالطريقة دي مش ببقى شايف كويس

الأول كنت بقول إن السبب في النضارة لكن دلوقت عرفت إيه السبب


فعلا كتير من المواقف في حياتنا مش بنعرف نحكم عليها كويس عشان مش بنبقى لابسين النضارة

وده ممكن يخلينا نظلم ناس كتييير واحنا مش واخدين بالنا عشان برده مش لابسين النضارة

فوق كدة ساعات بنزعل من تصرفات ناس كتير من غير ما نفكر للحظة واحدة ونقول : معلش مش يمكن مش لابسين النضارة

طب ليه احنا بنزعل من الناس بدون حق ولما نعرف الحقيقة نقول معلش أصل مكنتش لابس النضارة

ورغم كدة لو حد زعلنا واتضح إنه ميقصدش عشان مكنش لابس النضارة مش بنقبل إعتذاره ونقول بعلو صوتنا : إنت نظرك ضعيف ولا عايز تلبس نضارة ؟؟؟

زحل شوال تخاريف الثورة :D




يا حلاوة يا ولاد أما الثورات دي طلعت جامدة بشكل فمع أول عيد بدون مبارك وبدون بن علي وبدون القذافي وبدون علي عبد الله صالح يتضح لنا إن هلال رمضان مش هلال بعد السنين دي كلها يطلع زحل وده خلاني أفكر

هو الهلال راح فين ؟؟

ويا ترى زحل ده فلول وللا إيه بالظبط ؟؟

ولو افترضنا إن زحل طلع فلول يا ترى بقى المريخ بلطجية والمشترى ثورة مضادة ؟؟
والحاجة اللي تقلق بجد ولازم ناخد بالنا منها إن أكيد ورا اختفاء الهلال أمن الدولة ولو فكرنا شوية هنلاقي إن أمن الدولة ليها مقرات في الفضاء أيوة في الفضاء متستغربش وانا اعرف ناس كتير في عهد مبارك خبطوا في الحلل وراحوا ورا الشمس لكن ورا الشمس كبييير جدا مش عارف صراحة مقر أمن الدولة فين بالظبط ورا الشمس وهل في على كدة وثائق لسة ماتحرقتش وشايلنها في المقر اللي ورا الشمس

بس الموضوع ده بين لنا حاجة تانية مهمة وبالدليل القاطع
أمريكا متورطة في دعم نظام مبارك كل السنين دي والدليل على كدة المقر بتاع أمن الدولة اللي ورا الشمس مين هايعملوا غير وكالة ناسا الأمريكية وبكدة طلعت وكالة ناسا وأمريكا فلول ولو عملنا فوكس على الموضوع ده هانلاقي إن الدكتور فاروق الباز طلع فلول لإنه شغال في ناسا والدكتور أحمد زويل طلع فلول لإنه قاعد في أمريكا وأكيد استعانوا بيهم عشان المقر اللي ورا الشمس وبكدة لازم ناخد بالنا إن مشروع الدكتور أحمد زويل بتاع مدينة العلم ده وارد جدا يبقى مقر أمن الدولة الجديد ومشروع الدكتور الباز بتاع ممر التنمية أكيد ممر سري بيرحوا بيه على مقر أمن الدولة الجديد الموضوع كدة يقلق والثورة في خطر المليونية الجاية لازم تبقى في الفضاء عشان نحرر الهلال من المقر اللي ورا الشمس ونجيب باقي الوثائق اللي ماتحرقتش وفيه سفن فضاء هاتطلع من المرسى بتاع الأتوبيس النهري اللي في التحرير  واحب أكد على كل اللي هايشارك في المليونية يجب لبس تقيل عشان الدنيا برد ورا الشمس ونجيب كمامات عشان فيه نيازك مسيلة للدموع هناك وربنا يستر علينا بقى خلصنا من البلطجية هنا هايطلعلنا هناك كائنات فضائية ممكن نجيب معانا عدد صيني صوتها عالي عشان كان في فيلم قبل كدة اتفرجت عليه والكائنات الفضائية ماتت في الأخر لما سمعت صوت الموسيقى وطبعا مننساش كل واحد يجيب انبوبة أكسجين معاه وإزازة كوكاكولا وإزازة خل ولو قابلك حد من سكان الفضاء هتقول الكلمة دي
We Come In Peace
زي الفيلم بالظبط


والله الموفق والمستعان